የአንድ ከተማ ሁለንተናዊ እድገትና ብልጽግና የሚወሰነው በዋናነት ባለው የሰው ኃይል ሁለንተናዊ ብቃትና ግልጽነት ባለው የአሰራር ስርዓት ነው። ቢሯችን የአዲስ አበባን ነዋሪዎች ከከተማ አስተዳደሩ ተቋማት የሚያገኟቸው የመንግስት አገልግሎቶች ስታንዳርዳቸውን የጠበቁ ፈጣን፣ ቀልጣፋ፣ ጥራት ያለው እና ፍትሃዊ እንዲሆኑ ለማድረግ ይሰራል። ለዚህም የከተማ አስተዳደሩን የሰው ሃይል ስምሪት፣ ብቃት ማረጋገጥና አቅም የመገንባት፣ አሰራሮችንና አደረጃጀቶችን ማጥናትና ተግባራዊ እንዲሆኑ የማድረግ፣ የአገልግሎት አሰጣጥ ስታንዳርዶችን የማውጣትና አተገባበራቸውን የመከታተል፣ አገልግሎቶች የተቀናጁና በቴክኖሎጂ የተደገፉ እንዲሆኑ የማድረግ እና መሰል ተግባራትን እያከናወነ ይገኛል። ​በአሁኑ ወቅት የከተማ አስተዳደራችንን የአገልግሎት አሰጣጥ ወደ ላቀ ደረጃ ለማሸጋገር በርካታ የሪፎርም ስራዎችን እያከናወንን ሲሆን፤ ከእነዚህም መካከል፡- • ​የአዲስ መሶብ አንድ ማዕከል የዲጅታል የመንግስት አገልግሎት፦ ነዋሪዎቻችን በከተማ አስተዳደሩ የሚሰጡ የመንግስት አገልግሎቶችን በአንድ ጣሪያ ስር በተቀናጀ መልኩ በፍጥነትና ያለ እንግልት እንዲያገኙ የሚያስችለውን "የአዲስ መሶብ" ወደ ተግባር እንዲገባ የተደረገ ሲሆን በቀጣይም በሁሉም ክፍለ ከተሞች እንዲሰፋ ለማድረግ በትኩረት እየተሰራ ይገኛል። ይህም የከተማዋን አገልግሎት አሰጣጥ ዲጂታላይዝ ለማድረግና የህዝባችንን እርካታ ለማረጋገጥ የምናደርገው ጥረት አካል ነው። • ​የሰው ሀብት ልማት፦ የመንግስት ሰራተኛውን አቅም በስልጠና በመገንባት፣ ስራን በውጤት ላይ መስረት ያደረገ (Result-based) አሰራርን በማስፈን ውጤታማና ለውጥ ናፋቂ የሰው ኃይል ለመገንባት እየሰራን እንገኛለን። • ​የአሰራር ማሻሻያ (Institutional Reform)፦ ቢሮክራሲያዊ መዘግየቶችን በመቅረፍ፣ ግልጽነትና ተጠያቂነት የሰፈነበት ዘመናዊ የመንግስት ተቋማዊ አደረጃጀቶችን ቀጣይነት ባለው መልኩ ለመፍጠርና ለማሻሻል እየሰራን ነው። ይህ ድረ-ገጽ እኛን በቀላሉ የሚያገኙበት፣ ስለ ስራዎቻችን መረጃዎችን በፍጥነት የሚያገኙበት እንዲሁም ግብረ-መልስ በመስጠት ለተሻለ ለውጥ አብረውን የሚሰሩበት መድረክ ነው። ​ስለሆነም ከተማችን አዲስ አበባን የላቀ አገልግሎት የሚሰጥባትና ለነዋሪዎቿ ምቹ የሆነች ከተማ ለማድረግ ህዝብን ማገልገል ታላቅ ክብርና ሀላፊነት እንደመሆኑ፤ ተገልጋዩን ህብረተሰብ በታማኝነት፣ በቅንነትና በሙያዊ ስነምግባር ለማገልገል ቃል እየገባን በምናደርገው ጉዞ የተገልጋዩ ህብረተሰብ ተሳትፎና ድጋፍ እንዳይለየን እንጠይቃለን። አመሰግናለሁ!